Borroka Izakiarentzat:
Ines Medinaren lana

Jacqueline Wilson

Inés Medinaren estudioan, New Yorkeko Brooklyn auzoan, egon nintzan lehenengo aldian, 2000ko zezeilean, jakin izan neban arteari eta bizitzari buruz nituan ideiek norabide barria hartuko ebela, asmau ezineko norabidea. Ohore handiz, bost urtez ikasi nebazan beragaz pinturaren eta marrazkiaren teknikak, eta, epe horretan, formak eta pentsamentua egituratzen dituan errealidadea susmatzen ikasteaz gain, Inésen koadroen bitartez, prozesu psikologiko eta espirituala garatzen ikusi neban.

Zeozelan esateko, oso prozesu naturala izan zan, benetan bikaina bihurtzen dan landare edo zuhaitz bat ikustea modukoa. Nire ikuspegitik, persona bat norbera izateko, edo, gehiago, norbera baino apur bat handiagoa izateko egiten dan bidaia gizatiar, psikologiko, espiritual eta fi sikoa dokumentatzen eben Inésen koadroek.

Hasieran, Inésen koadroek buruaren lasaitasuna adierazoten eben oso modu garbian, buruaren barruan dagoanaren ezagutza eta, amaitzeko, buruaren desokupazinoa. Esan beharrik be ez dago asko egoala buru haretan; astero sorpresa bat hartzen neban, haren lanen edukiari begira egoten nintzanean. Bertan, Inésen bidaia adierazoten eben buruaren eta emozinoen nahasteak eta agitazinoa ikusten nebazan egituratuta.

Prozesu nahasi harek urte batzuk iraun zituan. Egun baten, eskolara heltzean, delikatua baizen zorrotza zan koadro bat ikusi neban –Ofrenda divina–, beraren aurreko lan guztiaren emoitza erakusten ebana. Baina bidaia amaitu barik egoan. Prozesuak jarraitu egin eban, eta, holan, buruaren eta emozinoen maila zorrotzagoetara, arraroagoetara, heldu zan. Gehiago esanda: emoten dau oraindino amaitu barik dagoala.

Inésen lanak prozesu psikologiko erreala dokumentatzen dau, eta prozesu hori pinturaren eta marrazkiaren bitartez dago adierazota. Ni prozesu horren zorioneko lekukoa izan naz. Inésen lanaren edertasun, espiritualtasun eta energia guztia gatxa baizen ederra dan prozesu horren emoitza da . Norbera dan horretan bihurtzeko prozesua.

Jacqueline Wilson
Dantza garaikideko dantzaria, artista, arte-merkataria